CYMA Lawm

YMA-in an kumpuan hmalakna atana Mizoram Synod-in Rs. 1,00,000/- an pek avang te, sawrkar, kohhran, pawl hrang hrang leh mimal thahnemngaite’n ruihhlo dona atana thilpek chi hrang hrang an pek avang leh an tawngtaipui thin avangin CYMA chuan lawmawm an tih thu thuchhuah an siam.

CYMA Lawm

YMA-in an kumpuan hmalakna atana Mizoram Synod-in Rs. 1,00,000/- an pek avang te, sawrkar, kohhran, pawl hrang hrang leh mimal thahnemngaite’n ruihhlo dona atana thilpek chi hrang hrang an pek avang leh an tawngtaipui thin avangin CYMA chuan lawmawm an tih thu thuchhuah an siam.

Motor Accident Avanga Boral

Ni 5.3.2008 khan LRM truck buhfai phur chu Seling thlen hma kawipui tawntirh kawnglaiah a let a, a driver chu truck hian a delh avangin Seling khawtlang mipui leh zin veivaka kalten nasa taka lakchhuah tumin an bei a, an accident hun kha tlai dar 3 vel nia hriat a niin driver hi zan dar 7:00 vel khan an lachhuak thei hram a ni.

Hemi chungchangah hian Branch YMA hruaituten thu an dawn danin Seling bulah motor a accident a, he motor-a chuang Mavena, Babutlanga awm chu a boral a ni awm e tih a ni a. Zarkawt Veng chhungah tunge Mavena tiin veng hruaitute an inzawh kual laiin Branch hruaitute chuan an chhungte lam atangin thu chiangkuang dawngin YMA angin hma min lakpui thei ang em? an rawn ti a. Truck accident-a driver boral hi a hming chu Lalvensanga (Mavena), kum 30 lo niin, PWD Tlanga PWD Office Chowkider Pu Pakunga makpa a ni a, Pu Pakunga te nen hian quarter-ah hian khawsa hovin a bulah hian a nupui nen fa pakhat neiin an awmho a ni.

Hemi zan hian Branch hruaitute chu Pu Pakunga-te inah hian tlan lutin, Pu Pakunga hi Mavena ruang an lo bawihsawmna Seling thleng hian an han kalpui a, hemi zan vek hian Pu Mavena ruang hi rawn la thlain, Pu Aldrin L.Ralte-te motor-in rawn phurhthlak a ni a, zan dar 11:30 khan Pu Pakunga-te quarter luah hi rawn thlenpui a ni. Bus-te ngaihtuah a nih hnuin Upa R.Biakhluna chuan hunserh a hmang a, hemi zan hian a nu leh pate awmna Zawlnuam panpui a ni. Mavena ruang daha zuk kal Pu Pakunga-te pafa ho pawh tunkar tir lam khan dam takin an rawn ho chho leh tawh a ni.

Lawmthu Sawina

Ka tahna leh lungngaihna, ka mangan lai pawha min thlahthlam phal lotu, tahna ruam ka zawh laia min hnemtu, Zarkawt Branch YMA te leh veng mipui, nu leh pate, veng hrang hrang atanga ka pasal thihna avanga min tuarpuitu zawng zawngte, a mal malin lawmthu ka sawi seng dawn lova, in mi tanpuina leh min lainatna hi keini nufa hian kan hre rengin, min lainattu te hi Lalpan malsawmin vengzel che u rawh se tih hi kan tawngtaina a ni e.
In lainatna dawngtu
H. Lalsangzuali
P.W.D. Tlang, Zarkawt.

MIMAL LEH KHAWTLANG HRISEL NAN

KAN hrisel theuh loh chuan khawtlang hrisel kan nei thei lo ang a, khawtlanga mi chengte kan hrisel theuh chauhin khawtlang hrisel kan siam thei chauh dawn a ni.

Natna kan ven theih tlangpuite chu – tlang hrileng hote hi an ni ber a. Tunhma ngaihtuah chuan tlang hrilengte hi kan nei tlem sawt hle. Naupang hrileng venna kan pek thin hnu phei hi chuan khuhhip leh hrilawn tihte kan hre ngai tawh lo va, zawnghri kan umbo tawh a, naupang zenghri umbo hna kan bei leh mek a. Khawtlangah chuan santen leh kawthalo hi kumtin kan la buaipui hi hnam changkangte hriat atan chuan a zahthlak ngawt a ni. A chhan chu kan chenna leh chhehvel kan titawp a, ei leh in kan titawp bawk a ni tih hi sawi ngai lova chiangsa a nih vang a ni.

Zun leh ek kan thlahdah a, thingtlang lam chu sawi loh, kan khawpui berah takngial pawh Ek in tawp lutuk, Tho inthlahpunna ‘maternity ward’ kan siam a ni ringawt mai a, a rimchhiat mai bakah tho inthlahpung khan an chenna hmun atanga natna hrik kha rawn thlawhchhuah puiin ei tur an bawmin an thingthla a, ngaihtuah mang lovin kan lo ei leh a, kan lo nat phah leh a. Septic tank Ek in nei thei lo tan pawh khur laih, tho lut thei lova a chhinna siam ngei tur a ni. Naupang chenin Ek inah chauh daikal ila, tichuan Ek in leh tho atanga natna inkaichhawn chi hi a bo vek loh pawhin a tlem phah hle ang.

Tui in atangin : Tuikhur tui emaw, kawmtui emaw ring tan hian kawthalo, santen, mitliam-te neih a hlauhawm duh hle. Thliin natna hrik tuikhura a lenluh emaw, tuihawkin a lenluh emaw, thliin a semdarh vangte pawhin a bul berah chuan khang natna lo vei hmasatute inthlahdah vang a ni ber a. Tuikhurah kalin kan tithianghlim fo thei lo va, mahni chhungkaw in tur erawh chu awlsam tein kan tithianghlim thei a ni. So bawrh bawrh khawpin chhuang la, ketli-ah emaw, filter emawah dah mai la, inna no chu chiah loh tur a ni a, suah aiin thlitchhuah mai a tha zawk nghe nghe a.Tui naran chhuanso loh in thin hian natna tam tak mi thlen thei a ni tih hria ila, filter-a dah tur pawh chhuangso hmasa zel ila a tha ber a, tichuan tui atanga natna inkaichhawn thih chu a bo leh hlauh thei dawn a.

Ei leh in thianghlim lo atangin : Rannung dang leh Tho bawm hnu ei atangin natna kan kaichhawng a, chawhmeh thing chhin phui loh leh lumso that loh ei atangin kawthalo hlauhawm chi kan inkaichhawng bawk thin a. Rannung dang leh Tho bawm theihin ei tur dah lo ila. Chawhmeh thing chhin phui loh chu ei loh mai tur a ni a, chhinphui pawh so tha taka chhuan leh tur, a bik takin sa leh sangha ang te hi. I chhinpui that a, i chhuanso that leh bawk chuan a him tawk.

Ei rawngbawltu : Ei rawngbawltu hian kut leh ke chenin a silfaiin a intithianghlim tur a ni. Ei rawngbawl laiin ran chokaah an lutin an chhuak chhen tur a ni lo, natna hrik an thehdarh thei a, ei rawngbawltu hi an fimkhur fo tur a ni.
Zuk leh hmuam kan uar avangin awm na benvawn leh natna chi hrang hrangte;Cancer chenin kan veiphah niin mi thiamten chuan an sawi a. Kan natphah thin zuk leh hmuam kan hmelma hi mimal leh khawtlang hrisel nan kan do ngam dawn lawm ni.

Chapchar-Kut Aizawla hman hmasak ber Zarkawt-ah (1949 March)

Aizawlah chapchar kut hlim tak leh thianghlim tak ruihtheih thil tel lova an hmanna hmasa ber chu kan veng Zarkawtah ngei hian a ni. Zarkawt kawnah, Police Point vel leh valley chhukthla hi zawl zau tawk nuam tak naupang pawh hlim taka an infiamna thin a ni a.

Hetah ngei hian chapchar kut chu an hmang a. Dawrpui leh Zarkawt chhungkua – Pu Buchhawna te, Pu Sainghinga te, Pu Lalsanga te, Pu Hmartawnphunga te, Pu Laltana, Pu Lalauva, Pu Chhawnzinga, Pu Lalmawia, Pu Kailuia, Rev. Zairema, Pu Thangseia (Baia), Pu Vankhama te unau, Pu Challeta, Pu Rualkhuma, Pu Ngila, Pu Kaichunga (Pu K. Thangzuala Pa), Seventh Day Sap (Pu Lowrie) te nupa leh midang tam fe an tel.

Hlim takin an chai a, artui an inbarh a, thingpui te an intulh a, naupang pawhin nuam an ti hle a ni. Kohhran lamin chhunzawm rih loh tha-a an hriat avangin kum lehah chuan ui tak chungin an ti zawm ta lo a ni.

2008 Village Council Sitting Vawi 2-na

Vawiin ni 08.03.2008 (Inrinni) zing dar 7:00 khan  Zarkawt V/C chuan Pu Lalhmachhuana, VCP-te inah Sitting an nei a. Member pakhat zinbo tih loh chu an kal kim a ni. Meeting hi VCP-in kaihruai a, Nl. Zosangpuii Parte in tawngtaina hun a hman hnuin Sitting hian an thurel turte an ngaihtuah chhunzawm. An thurel tlangpuite :

1. Veng chhunga vawksa zawrh dan tur (rate) chungchang an ngaihtuah hmasa a, Mizoram Village Council Association thuchhuak angin veng chhunga vawksa zuar reng rengte chuan Association bituk kg. 1-a Rs. 120/- anga zuar theilo te chu veng chhungah zawrh khap ni se an ti.

2. Veng chhunga bawngsa leh sangha zuar awmte  pawh hian veng in awpna dan a kalh avangin  Senior  Sanitation Officer hnenah hmalak pui tura ngen ni se an ti bawk.  Tin, Pathianni a   Pi Doremi te in, Valley leh Pu S. Lalnghinga (L) te in kawta hmawmsawm zuar a thu thin  te pawh phalloh/khap ni se Sitting chuan a  ti bawk a ni.  PWD Tlang leh Pu Thanglianchhunga (L) te kawmthlanga Garbage Trailer chhe tawh tak chungchang pawh Senior Sanitation Officer hnenah thlen ni se tih a ni.

3. Sawrkar hnen atanga lehkha hrang hrang hmuhte an ngaihtuah ho leh a. Project Director (DRDA) in NREGS hnuaia Household Survey Report leh hnathawh tur list siam tura chiang zawka Office lam lo dawr turin Secretary ruat nghal a ni.

4. Night Watchaman duty  thinte atanga chhawrzui tura an rawn ngenna chungchangah Dawrpui V/C leh YMA nen Zarkawt V/C leh YMA Office Bearer-te hun remchang hmasa berah Joint Meeting neih phawt a, a tul anga hmalk ni se an ti bawk a ni. Hemi chungchangah hian veng mipuite hnenah ngaih dan leh an inhuam dan te YMA chanchinbu ah chhuah in in rawn kualna te neih ni se an ti a

Kohhran Programme

PRESBYTERIAN KOHHRAN PROGRAMME
(08.03.2008) 6:30 P.M. (INRINNI ZAN)
Tantu : Pi Chalngaii
(09.03.2008) 10:00 A.M. (PATHIANNI)
Tantu : Pi Rongengi

(09.03.2008) 1:30 P.M.
Chairman : Upa Vanlalhruaia
Tantu : Pi Lalrintluangi
Thusawitu : Tv.H.L.Chalbuanga (ATC)

(09.03.2008)6:30 P.M. (ZAN INKHAWM)
Chairman : Upa Vanlalhruaia
Thusawitu : Pu Zoramthanga

KTP PROGRAMME

(09.03.2008)Pathianni: (Tawngtai Inkhhawm – GROUP PUAL)

DAVID GROUP
A hmun : Pu Lalhmingliana In, McHill
Hruaitu : Nl. P.B.Lalfakawmi (Gr.Fin.Secy.)
Tantu : Nl. Zothanpuii

DANIALA GROUP
A hmun : Pi Malsawmi (Sawmpuii) In, PWD Tlang
Hruaitu : Pu Ngurthansanga (Group Leader)
Tantu : Nl. Lalthanpuii

JOSEFA GROUP
A hmun : Pu Lal Thanzara In, Main Street
Hruaitu : Pu Zohmingthanga (Gr. Asst. Leader)
Tantu : Nl. Vanlalhmangaihi (Gr.Comm. Member)(

(10.03.2008) 6:30 P.M. (Thawhtan Zan Inkhawm)
Hruaitu : Pu Lalhmangaiha (Br. Leader)
Tantu : Nl. Lalhruaitluangi (Davida Group)
Thilpek Lakkhawmtute : Tv. Simeia Fanai (Josefa Group.)
Pu Laltawnliana (Josefa Group)
Pu Lalmuanawma (Daniela Group)
Hun Hman Dan : DEBATE
Motion : “Kohhran Zaipawl thatna turin member ruat bik neih a tha.” (Group tin atangin mover (1) leh opposer (1) theuh ruat ni se.)

Operation Jeriko Programme
A hmun – Zarkawt Presbyterian Biak In
A hun – 10.03.2008 (Thawhtanni); 5:30 P.M.
Hruaitu – Pu Lalrengpuia, Main Street

Editorial: Zarkawt Kawn Kawng Dung

Mi tam takin an lo sawi thin tawh angin Zarkawt veng hi chu veng laili leh Aizawl khawpuiah ngat phei chuan sumdawnna hmunpui tiha hming vuah theih te pawh a ni hial awm e. Mihring kan lo pungchho zel a, ram lah tihpun leh zauh belh ngaihna awm tawh si lo, kan inhnawhchep mek zel a, hmun awl rem laiah lah kan insah khah siak emaw tih mai tur a lo ni ta. Traffic leh mihring pawh bazar velah phei chuan kan ‘jam’ tlang dul dul tawh mai chu a nih hi. Mahni thlai thar ngei ngeite leh mahni dil sangha zuarte’n an zawrhna hmun atanga hnawtchhuaktu an tawn zel avangin an inzawrhna hmun tur ngiatin hma an la mek zel bawk a. Hetiang hi hmasawnna in a rawn ken tel zel a ni kan tih laiin kan veng mipuite hian kan ngaihtuah hmanhawm tur pawimawh tak awm ni a lang chu Zarkawt kawn kawng dung zawng zawng mai a, zan dar 8 atanga tlaivara motor lian leh te ding khat dul mai thinte hi an ni.

A bul hnaia cheng lemlo te tan chuan eng ang chiaha ngaihpawimawha hmalak tur nge tih pawh hriatthiam a har hle ang. Amaherawhchu, Zarkawt kawn kawng dung leh a vela chengte tan chuan heng (a bikin thingtlang bus leh truck thenkhat) motor ding tlaivar thinte hi chu phurrit lian tak an tling thei tih hi kan hriat a tha awm e. Zan rei tak tak thleng motor chhunga music/rimawi (mawi lemlo nen) a rik reng bakah heng motor driver leh an thiante hian thawm an dimloh mai bakah veng mite in luh ka tak mai an han hnawhping hmiah thinte hi chu ngaimawhawm tham ve chu a tlin ngei a rinawm a ni. A khamawm hle ang! Muttui dawn tak tak lai zing dar 4 bawr velah motor ALARM-in kaihthawh an han ni leh zel a, ring tak takin motor engine tihlum tumin khawvar hma atangin an rum tir vut vut reng tawh mai a ni.

Hei mai hi a la nilo, zan lamah phei chuan heng motor ding thin driver thenkhat leh an thiante avang hian kan veng nula thenkhat ten harsatna an lo tawk tawh thin tih sawi rik a ni fo ta mai hian ngaih a ti tha lo lehzual a ni. Thil duhawmlo a thlen tak tak hma hian helai kawngpheia motor ding thinte hi chu khawtlang hruaitute hian an chungthu ngaihtuah ni se a duhawm hle mai. Engpawh chu lo ni se, tlaivar thak a Zarkawt kawng phei a Bus/Truck/Sumo etc. ding thinte tan hian inthiarna mumal engmah ruahman sak an nih loh avang hian Vengchhung titawptu an ni miau si a, chuvangin thenfai hna hi thawh tan mai a tha lawm ni?

Editorial: Zarkawt Kawn Kawng Dung

Mi tam takin an lo sawi thin tawh angin Zarkawt veng hi chu veng laili leh Aizawl khawpuiah ngat phei chuan sumdawnna hmunpui tiha hming vuah theih te pawh a ni hial awm e. Mihring kan lo pungchho zel a, ram lah tihpun leh zauh belh ngaihna awm tawh si lo, kan inhnawhchep mek zel a, hmun awl rem laiah lah kan insah khah siak emaw tih mai tur a lo ni ta. Traffic leh mihring pawh bazar velah phei chuan kan ‘jam’ tlang dul dul tawh mai chu a nih hi. Mahni thlai thar ngei ngeite leh mahni dil sangha zuarte’n an zawrhna hmun atanga hnawtchhuaktu an tawn zel avangin an inzawrhna hmun tur ngiatin hma an la mek zel bawk a. Hetiang hi hmasawnna in a rawn ken tel zel a ni kan tih laiin kan veng mipuite hian kan ngaihtuah hmanhawm tur pawimawh tak awm ni a lang chu Zarkawt kawn kawng dung zawng zawng mai a, zan dar 8 atanga tlaivara motor lian leh te ding khat dul mai thinte hi an ni.

A bul hnaia cheng lemlo te tan chuan eng ang chiaha ngaihpawimawha hmalak tur nge tih pawh hriatthiam a har hle ang. Amaherawhchu, Zarkawt kawn kawng dung leh a vela chengte tan chuan heng (a bikin thingtlang bus leh truck thenkhat) motor ding tlaivar thinte hi chu phurrit lian tak an tling thei tih hi kan hriat a tha awm e. Zan rei tak tak thleng motor chhunga music/rimawi (mawi lemlo nen) a rik reng bakah heng motor driver leh an thiante hian thawm an dimloh mai bakah veng mite in luh ka tak mai an han hnawhping hmiah thinte hi chu ngaimawhawm tham ve chu a tlin ngei a rinawm a ni. A khamawm hle ang! Muttui dawn tak tak lai zing dar 4 bawr velah motor ALARM-in kaihthawh an han ni leh zel a, ring tak takin motor engine tihlum tumin khawvar hma atangin an rum tir vut vut reng tawh mai a ni.

Hei mai hi a la nilo, zan lamah phei chuan heng motor ding thin driver thenkhat leh an thiante avang hian kan veng nula thenkhat ten harsatna an lo tawk tawh thin tih sawi rik a ni fo ta mai hian ngaih a ti tha lo lehzual a ni. Thil duhawmlo a thlen tak tak hma hian helai kawngpheia motor ding thinte hi chu khawtlang hruaitute hian an chungthu ngaihtuah ni se a duhawm hle mai. Engpawh chu lo ni se, tlaivar thak a Zarkawt kawng phei a Bus/Truck/Sumo etc. ding thinte tan hian inthiarna mumal engmah ruahman sak an nih loh avang hian Vengchhung titawptu an ni miau si a, chuvangin thenfai hna hi thawh tan mai a tha lawm ni?