Lawmthu

Nl. Lalthanpuii Treasurer K.T.P Zarkawt Br, chuan lehkhabu tha tak ‘Mi fing thu leh an thuril sawite’ -
P. Lalnithanga ziah chu Kairos Editorial Board te min rawn pe a, kan lawm tak meuh meuh a ni. Tin, ni 9 Aug. 2007 khan zanriah tuihnai tak min buatsaih sak bawk a, a chungah Kairos Editorial Board te kan lawm tak meuh meuh a ni. Tih fo chi niin kan hria.

Missionary Chamtea Chanchin

Missionary Pu Rinchamliana, ‘Chamtea’ ti-a kan hriat lar tak hi Pu M. Dawngliana leh Pi Sangliani te fa pali zinga a tlum ber niin ni 17.11.1978 khan alo piang a. A naupan tet KG zirlai anih laiin a silai lem khalha a mu tang chu hip chhuah a tum a, nasa taka a beih hnu chuan a hip chhuak a, mahse vanduatthlak takin a dawlh/ lem ta tlat mai. A hip na tha nen anih avangin a chuapah silaimu chu a lut ta a. Dam chhuak tawhlo tura ngaih a ni a, Vellore hmunah te damna beiseiin an zuk kal a, eng a ang thei ta lo. Chutianga dinhmun khirh taka an awm lai chuan a nu chuan, “I dam leh anih ngai chuan Missionary-ah i inpe dawn nia” tiin a lo hrilh thin. Mak tak maiin dan tawh lo tura ngaih kha a lo dam leh tlat mai a. A naupan laia a nu thusawi chu a bengah a cham ta tlat a. Tun thlenga a nun hruaitu a ni ta zel a ni. A lo thanglian ve zel a, college a kal ve lai pawhin nun sual leh hmuh hrehawm a nei ngailo. Tluang taka zir zelin B.D chu UTC, Bangalore-ah zir zovin ni 23 April, 2004 khan B. Lalchhandami nen ‘Kumtluang atan’ tiin an innei a, tunah hian fapa duhawm tak Rinfela tia an koh chu ni 23 June, 2007 khan an nei a, duat takin an enkawl mek a ni.

Kristian chhungkua leh Use condom – Lalthanzawna (Tetea) (Fr: Kairos August)

Kristian chhungkaw din tura pawimawh tak pakhat chu nupui pasal ineih hmaa sex hman loh hi a ni. Mahse tunlai khawvelah chuan a him chhung chuan sex hman a pawi lo, condom I hman chhung chuan sex hman a pawi lo tih hawi zawng hian rilru kan pu ti tih der mai. Sex hman chung changah hian ringtute min hruaitu tur thil pali a awm, chung te chu ABCD hi a ni. A chu Abstinence a ni. Kristian chuan sex hi kawppui a neih hma loh chuan hman loh tur (Abstain) tih hi kan dinna a ni. He abstinence (A) hi a tlin lo a nih chuan B-ah a kal ang. Chu chu Be faithful a ni. Nupaa insiam hma sex hman miah loh hi a tlin lo a ni chuan kawppui bik neiin rinawm rawh se. B chu a la tlin lo lehzel a kawppui bik a nei thei lo a nih chuan C-ah a kal ang. Chu chu condom hmang rawh se tih a ni. C chu a tlin lo zel a nih chuan a hmabak chu D a ni. Chu chu death a ni. A leh B bawhkan hian a third option hi kan hre lar hlur a, a him chhung chuan sex hman hi pawilo ah min ngaih tir mek a ni. Kristian chhungkua din tur hian A hi kan dinna tur a ni tih hriat nawn a va tul em. Kristian chhungkaw tan chuan use condom for safe sex nilo in no sex before marriage hi kan chang thlan tur a ni e.

Nangma Chung Ngeiah (FR: Kairos August)

I chhungkaw enkawl mawhphurhna chu i kovah, nangma mimal chung ngeiah chuan a lo tla ta a, i chhungkaw pawn lam a mi tumah in nangmah ang tlukin mawh an phur kher in a rinawm loh. Chuvang chunan ngaihpawimawh chu i bat/tih tur a ni (I Tim. 3:4). Kristian kan nih angin, Kristian chhungkua, Pathian nena hlim leh lawm taka nun ho tak takna Kristian chhungkua din hi chhungkaw hotu ber mawhphurhna a ni.
A chang erawh chuan mi thenkhat chungah kohna danglam deuh tak a thleng thei (Luka 14:25-27). Chutiang bawkin keini ringtu zawng zawng tan pawh hetiang hun danglam eng emaw bik atan a thleng thei reng tih hre tel bawk ila. A thu hrimah kan Lalpa hian Amah aia ngaih pawimawh leh hmangaih zawk kan neih hi rem a ti lo. Kan hmangaih berah Pathian kan neih rualin chhungkuaa Pathian hmangaihnaa kan in hmangaih tawn hi a duh a ni (Sam 113).
Pathianin min hmangaihna nasat zia hi hre reng la, Lalpa’n, “Nangma chung ngei a” a dah i mawhphurhna – chhungkua hmangaih taka enkawl hi – Pathian i hmangaih let ve na a ni tih hre reng ang che.

Dawrpui Pastor Bial Half Yearly Meet 2007 Vawi 23-Na

Dawrpui Pastor Bial Half Yearly Meet 2007 Vawi 23-Na chu ni 28 leh 29 khan Zarkawt Presbyterian Kohran Biak Inah hman zawh a lo ni leh ta a. Kumin hi Dawrpui Pastor Bial KTP tan chuan kum pawimawh tak mai a ni a. Bial KTP kum 50-na Golden Jubilee, Bial Zaipawl kum 25-na Silver Jubilee leh KTP Inleng (Bial KTP chanchinbu) kum 25-na Silver Jubilee a ni. Tin, Half Yearly Meet vawi 23 kan hmanna a lo ni ta reng bawk a. Hetiang taka kum pawimawh hmang mektu kan ni hi kan vannei em em a ni.

Dawrpui Pastor Bial KTP te kan lo tet (Chhinga veng pastor bial din hnuah) hnua Bial KTP Half Yearly Meet hmasa ber a ni a. Member te’n kan hlut viau ang nge… ‘kan tlem ta sia’ tiin kan ngai pawimawh lemlo ang tih chhut thiam har tak chungin nikum-a Bial Conference-ah khan ‘Half Yearly Meetah se,’ tiin passed a lo ni tawh a. Amaherawhchu kan ti dawn nge.. kumin kan Meet hi kan hlut hle niin a hriat a. Inkhawm apianga inkhawm zat pawh member awmdan atanga chhut chuan a tha thawkhat hle a ni. Thlengtu Zarkawt Kohhran nu leh Pate’n ‘Chawlh’ anga kan ngai thin nia lang erawh hi chu a tha lo hle. Intawiawm theih te hi a hlut tehlul nen.

Kumin Meet-ah hian Zaiawl “Lalpa Ropuina” leh Bible Quiz “Tihkohte” hmangin intihsiakna a ni a. Inrinni zan leh pathianni chawhnu-ah Bible Quiz neih a ni a, Pathianni chawhma ah zaipawl intihsiak a ni bawk. Inkhawm apiangin Sermon ngaihthlak thin a ni a. Pastor Rualkhuma bialtu pastor te, Upa Malsawma bial Chairman te, Upa Lalthanzama asst. Secy. CKTPte hnen atangin Sermon ropui tak tak ngaihthlak thin a ni. Bible quiz hi Upa Lalengzaua, Chhinga Veng E Dawrpui Pastor Bial KTP Leader poh lo ni tawh in a buatsaiha, a in buatsaihna a tha hle tih a hriat theih. Amaherawhchu, zawhna in balance leh zual ni thei se a duhawm hle, tiin comment kan dawng. Tin, Zaipawl zaite endik tur hian Mizoram pum huap pawha mithiam tak tak Pu Vanlalvuana Chandmari te, Pu Lalbiakthanga Dintharte, Tv. Rinzauva Khatla leh Tv. Manase Saphmingthanga Ramhlun S, te sawm anni a. Anni hian tha takin zaipawl zaite an endik a ni.
Bible quiz ah hian Saron Branch chu pakhatna an ni a, zaipawl ah hian Zarkawt Branchte pakhatna kan ni thung. He intihsiakna atan hian hun rei tak kan inbuatsaih a ni a. Group intihsiak te neiin chumihnuah pawh brach huapin tihtakzetin chhunzawm zel a ni. Hetianga thalaiten Pathian thu leh hlaah intihsiakna thianghlim theihpatawp a an in beih hi a ngaihhlut awm em em a, nu leh pate lamin kan hlutsak lo erawh hi chuan ngaihtuah kan ti thui khawp mai. Khawvel thil kawng engemoah chuan kan fate chevel hi kan ngaihven hle kha ani thin a, Pathian thu lam kawngah an hniak kan chhuisak peihloh hi chuan ngahwng thalo a thlen zel ang tih a hlauhawm hle a ni.

Pictures en duh chuan: http://Zarkawt.4shared.com